GIPATUMAN na sa Barangay Cugman uban sa Task Group Demolition sa syudad ang pag-reclaim sa dalan diha sa Zone 2 Talipapa sa nasangpit nga barangay pinaagi sa pagtangtang sa mga illegal structures nga nilapas sa road-right-of-way, Martes Hulyo 22, 2025.

 

Mga personahi sa Barangay Cugman mao ang nangulo sa clearing operation inabagan sa TG Demolition pinangulohan sa chairman nga si Antonio Resma Jr., mga personahi sa City Engineering Office (CEO), Office of the Building Official (OBO), Business Permit and Licensing Division (BPLD), Roads and Traffic Administration (RTA), Cagayan de Oro City Police Office (Cocpo), Special Weapons and Tactics (SWAT), ug Cepalco.

 

Nasayran nga gi-assessed usab sa Cugman Barangay Council pinangulohan ni Punong Barangay Maria Luisa Aldeguer ang mga apektadong mamaligyaay sa maong Talipapa kung kinsa ang angayan nga hatagan og kabalhinan o puwesto aron dili maundang ang ilang panginabuhi.

 

Ang nakalapas nga mga illegal structures maoy usa sa mga hinungdan sa pagkabara sa dagan sa trapiko sa maong lugar ingon man sa pagbaha kay nasiraduhan ang dako nga bahin sa kanal gumikan sa gitukod nga illegal structures.

 

Ang clearing operation ug pag-reclaim sa mga dalan nga gitukoran sa mga illegal structures ug gi-okupar sa mga sidewalk vendors ingon man mga nag illegal parking ang gihingusgan sa pagtuman sa administrasyon ni Mayor Rolando `Klarex’ Uy nunot sa kamandoan sa Department of the Interior and Local Government (DILG) aron magamit sa insakto nga katuyoan ang kadalanan ug dili maminusan ang paghuot sa dagan sa trapiko. (ALR/CIO/Photos by Reynan Baylin/CIO)