GIPANGUNAHAN ni National Commission of Senior Citizens Region 10 Officer-in-Charge Rey Benedict Aquiatan kauban ang kagamhanang lokal sa Cagayan de Oro sa pagpangulo ni Mayor Rolando ‘Klarex’ Uy ang pagpahigayon sa ‘Expanded Centenarians Act’ cash gift distribution sa mga qualified senior citizens karong adlawa, Hulyo 25, 2025 diha sa City Tourism Hall.

 

Ang cash gift distribution nunot usab sa kasaulogan sa 6th anniversary sa NCSC bitbit ang tema, “Empowering Seniors, Enriching Communities’.

 

Nasayran nga moabot sa 396 ka mga senior citizens ang nalakip sa programa diin tulo kanila ang mga centenarians o nag-edad og 100 years old.

 

Subay sa Expanded Centenarians Act kon Republic Act 11982, ang qualified senior citizens nga motung-tong sa untop edad nga 80 anyos, 85 anyos, 90 anyos ug 95 anyos makadawat og cash gift nga nagbalor 10,000 pesos.

 

Samtang ang makatung-tong usab sa 100 years old makadawat og cash gift nga 100,000 pesos.

 

Pinaagi ni City Councilor Al Legaspi Sr., gipadangat usab ni Mayor Klarex iyang pagtimbaya ug pagpasalamat sa mga senior citizens kinsa dako og tampo sa kaligdong sa matag pamilya ug sa katilingban.

 

Dako usab ang pasalamat ni Office for Senior Citizens Affairs Head Douglas Dabatian sa lain na usab nga higayon nga mapasidunggan ug mapahalipayan ang mga senior citizens pinaagi sa programa.

 

Ang maong kalihokan gipaluyohan sa National Commission of Senior Citizens (NCSC – X), uban sa hugot nga suporta sa kagamhanang lokal ubos sa administrasyon ni Mayor Rolando ‘Klarex’ Uy, pinaagi sa City Social Welfare and Development Office (CSWD) ug Office for Senior Citizens Affairs (OSCA). (AGP/Photos by Iren Fuentes & Jun Cañete/CIO)