Usa ka higanteng hotel chain sa nasud ang gikatakdang mopahimutang sa ilang 30-storey hotel dinhi sa uptown Cagayan de Oro.

 

Kini ang pamahayag ni City Mayor Rolando ‘Klarex’ Uy atol sa flagraising ceremony, Lunes, Agosto 4 sa city hall human iyang gibutyag nga mopahigayon og groundbreaking ang mga kadagkoan sa Radisson Blu Hotel & Residences diha sa may uptown Cagayan de Oro karong hinapos sa bulan sa Agosto o’ kaha sa unang semana sa Septiyembre ning tuig.

 

Gihinangop sa mayor ang maong positibong kalamboan sa natad sa negosyo, sanglit makahatag kini og dugang tingusbawan sa ekonomikanhong kalamboan sa dakbayan, gawas pa nga maghatag usab kini og dakong oportunidad sa panarbaho sa mga Kagayanon, dugang pa sa mayor.

 

Ang 30-storey Radisson Blu Hotel & Residences mao unya ang pinakaunang five-star hotel and branded residential development sa Cagayan de Oro nga motubag sa nagkataas nga demand sa mga large-scale events ug corporate functions sa Northern Mindanao, ug magsilbing venue sa mga meetings, incentives, conferences, ug exhibitions kon MICE. (CIO/photo by Reynan Baylin)