“Wala nay sidewalk vendors gikan sa Domingo paingon sa Huwebes”.

 

Kini ang pamahayag ni Mayor Rolando `Klarex’ Uy atol sa pagpangguba sa mga timbangan nga nakumpiska sa mga personahi sa City Economic Enterprise and Business Development Administration (CEEBDA), adlaw’ng Martes, Agosto 5, tungod sa dili insakto nga timbang.

 

Si Mayor Klarex mipasabot nga taas na kaayo ang panahon sa iyang gihatag nga higayon ug pagsabot sa mga sidewalk vendors nga makapamaligya sa mga dapit nga gitugot sa syudad.

 

Apan nagpadayon usab sila sa paglapas sa mga gabayan ug balaod gumikan kay bisan asa na lamang sila mamaligya ug okupahon pa halos ang usa ka lane lakip pa ang pedestrian lane.

 

Usa kini sa mga hinungdan nga misamot kahuot ang dagan sa trapiko sa Cogon Market gumikan sa mga sidewalk vendors nga wala na nagsubay sa mga gabayan sa Night Market ug balaod sa syudad.

 

“Wala ninyo ampingi ang akong gihatag nga kahigayonan”, dugang ni Mayor Klarex uban ang pagpangayo og pasaylo ngadto sa mga sidewalk vendors kalabot sa iyang desisyon.

 

Ang paguba sa nakumpiska nga mga timbangan gipasiugdahan sa CEEBDA pinangulohan ni Dep.t Manager Atty. Marianne G. Ragas uban nila ni Majority Floor Leader City Councilor Edgar Cabanlas, chairman sa Economic Enterprise, City Councilor Yan Lam Lim, ug Atty. Melanie Cabanlas. (ALR/CIO/Photos by Iren Fuentes/CIO)