MAPASALAMATON ang mga nakabenepisyo sa People’s Day ni Mayor Klarex Uy karong adlawa, Agosto 6, nga gipahigayon sa City Tourism Hall, ning siyudad.

 

Si Mary Jean Ordiz, taga Barangay Agusan ug aduna’y gihambin nga sakit nga breast cancer ug anaa na sa stage 4 midawat og cash assistance gikan sa City Social Welfare and Development Department diin sumala niya iyang gamiton isip panggastos sa iyang chemotherapy.

 

“Mayor maski naa ko’y gibati sa lawas nangayo ko og tabang bahala’g gamay basta kanunay. Wala ko nagdahum sa akong pag-anhi nga dali ra ma-release ang among gihangyo sa CSWD nga hatagan mi sa ilang tabang. Salamat kaayo, Mayor,” saysay ni Mary Jean.

 

Ang People’s Day agi’g personal nga pagpaminaw ni Mayor Klarex sa mga panginahanglanon sa mga Kagay-anon. Kini usab gilangkoban sa nagkadaiyang serbisyo sa buhatan sa city hall sama sa libreng wheelchair, champorado ug uban pa.

 

Nasayrang ang People’s Day sa city hall ipahigayon matag Miyerkules sa bulan ug dal-on sa mga mosunod nga Lunes sa mga kabarangayan. (NLB/CIO/photos by Jhoanne Abejo/CIO)