MALAMPUSON ang pagbugsay sa 3rd International Dragon Boat Fiesta Race 2025 sa unang adlaw niini sa Isla de Oro, adlaw'ng Sabado, Agosto 9 ning tuig, subay sa pagsaulog sa Higalaay Festival 2025.

 

Gisugdan kini sa eye dotting ceremony o ang 'pagmata sa dragon,' usa ka ritwal nga nagpasabot sa paghatag kinabuhi ug kusog sa dragon boat alang sa pagsugod sa maong kompetisyon.

 

Gipasiugdahan kini sa kagamhanang lokal nga gipangulohan ni Mayor Rolando 'Klarex' Uy pinaagi sa Trade and Investment Promotion Center (ORO-TIPC) nga gipangulohan ni Department Manager John W. Asuncion, uban sa suporta ni City Councilor Kenneth John D. Sacala, Councilor Al P. Legaspi Sr., ug Department of Tourism Regional Director Marie Elaine S. Unchuan.

 

Mainiton nga gi abi-abi ni City Administrator Atty. Roy Hilario Raagas ang mga bisita ug contingents, nga nag-ingon: 'In the name of Mayor Klarex Uy, good luck and may the true sportsmanship stay and may the camaraderie be built, and looking for more activities like this in the near future.

 

Adunay napulo (10) ka mga teams ang magtigi sa dragon boat competition, lakip na ang usa ka international team nga mao ang Spanish Dragons gikan sa Hong Kong. Uban kanila ang mga local contingents sa nasud nga naglangkob sa CGY Oro Dragons, Barangay Carmen Dragon Boat, Alliance of Masters of DB Inc., UZ Wildcats, Burgos Dragons Braveheart, Philippine Navy Dragonboat Team, Bakunawa Dragonboat, The Hamlet Dragons, ug Samal Dragons.

 

Ang awarding ceremony alang sa mga mananaog ipahigayon sa ikaduhang adlaw sa maong event, adlaw'ng Domingo (Agosto 10).

 

Ang Kagay-an International Dragon Boat Fiesta Race usa sa trese (13) ka mga core events ug ikaduhang core activity nga gipahigayon alayon sa Higalaay Festival human sa grand launching niadtong Biyernes, Agosto 8, sa Rio de Oro Boulevard. (MDS/CIO/Photos by: Jhoanne Abejo & Roel Felicitas/CIO)