GITAPOS ang ikaduhang adlaw sa 3rd Kagay-an International Dragon Boat Fiesta Race sa Isla de Oro Boulevard, niadtong Dominggo (Agosto 10), pinaagi sa awarding ceremony alang sa mga mananaog sa nagkadaiyang kategorya.

 

Adunay unom (6) ka kategorya nga adunay standard 22 Crew Racing Boat (DB22), nga naglangkob sa 20 ka paddlers, usa ka drummer, ug usa ka steersperson ug ang kategorya gibase sa edad ug gender divisions.

 

Sa open division, mahimong moapil ang lalaki ug babaye, samtang sa mixed division, mas daghan ang lalaki kompara sa mga babaye.

 

Sa premier division, walay limit sa edad nga mahimong moapil.

 

Ang mga mananaog mao ang mosuod:

 

500M-DB22-Premier Mixed midaog ang Philippine Navy Dragon Boat Team.

 

500M-DB22-24U-Mixed - nasakmit kini sa UZ Wildcats sa Zamboanga.

 

200M-DB22-Premier-Open, midaog ang Bakunawa Dragon Boat Team gikan sa Iligan City.

500M-DB22-Premier-Open, nasakmit gihapon sa Bakunawa Dragon Boat Team ang kadaugan samtang sa 500M-DB22-24U-Open, nakuha sa Brgy Carmen ang unang pwesto.

 

Samtang sa 2000M-DB22-Premier-Mixed, nga usa ka time lapse race diin ang pinakapaspas nga oras ang basihanan sa kadaugan, nakuha sa Barangay Carmen ang titulo isip King River.

 

Ang mga mananaog nakadawat og usa ka personalized medal, plaque of recognition, ug cash prize.

 

Ang international dragon boat competition kabahin sa kasaulogan sa Higalaay Festival 2025 nga gipangulohan sa kagamhanang lokal ning syudad pinaagi sa Trade and Investment Promotion Center (ORO-TIPC) ubos sa pagdumala ni Department Manager John Asuncion, uban ang suporta ni Mayor Rolando 'Klarex' Uy.

 

Taliwala sa kakapoy ug kainit sa adlaw sa pagbugsay, mipatigbabaw ang panaghigalaay ug ang paglingaw-lingaw sa mga contingents sa awarding night ug ilang gikalimtan ang kompetisyon atol sa usa ka fellowship dinner nga gidalit ni Mayor Klarex.

 

Kini simbolo sa tinuod nga diwa sa Higalaay Festival, ang pagpakig-higala sa matag usa. (MDS/CIO/Photos by: Roel Felicita and Reynan Baylin/CIO)