People’s Day program ni Mayor Klarex Uy, gidala sa Barangay Indahag, adlaw’ng Lunes, Agosto 11 diin dako ang kalipay ug pasalamat ni Punong Barangay Marlon Fidel D. Bongay Jr sa kahigayonan nga gihatag sa mayor sa ilang barangay.

 

Sa laing bahin, nagpasalamat usab si Mayor Klarex Uy sa hugot nga suporta sa Brgy Indahag diin iyang gipasabot nga dili lamang taman sa piniliay mabati ang iyang serbisyo apan magpadayon kini sa iyang pangatungdanan.

 

“Gidala nako ang People’s Day aron makigduyog, makig-uban kaninyo sa pagpakayab sa atong nasudnong bandila. Dili lang sa panahon nga aduna’y piliay moanhi mi. Nianhi mi sa pagpasalamat, pag-ila nga dako kaayo og kahimanungdanon sa inyong pagsuporta, pagsalig kanamo. Dili ko gusto nga kamo nga naghatag og suporta, kalimtan lang mo human sa kalampusan ug kadaugan,” saysay ni Mayor Klarex Uy.

 

Lakip sa gitanyag sa People’s Day ang nagkadaiyang serbisyo sa buhatan sa city hall sama sa libreng check-up, duha ka kilo nga bugas, wheelchair, ug uban pa.

 

Misalmot usab ang mga miyembro sa 21st city council nga sila si City Councilor Eric Salcedo, City Councilor Atty. Edgar Cabanlas, City Councilor Yan Lam Lim ug City Councilor Dok Paolo Nicolo Gaane.

 

Ang Barangay Indahag mao ang pinakaunang barangay diin gidala ang People’s Day sa bulan sa Agosto ug mokabat sa 578 ang naserbisyohan niini.

 

Tumong sa People’s Day ang mapaabot ang serbisyo sa city hall sa mga kabaranggayan. (NLB/CIO/photos by Roel Felicitas and Jhoanne Abejo/CIO)