GIPASIDUNGGAN sa Department of Labor and Employment Northern Mindanao ang Public Employment Service Office (PESO) isip Best PESO regional winner for highly urbanized category, adlaw’ng Lunes, Agosto 11 ning tuig.

 

Mismo si DOLE X Regional Director Atty. Joffrey M. Suyao ang mitunol sa pasidungog sa gipahigayong 2024 Search for Best PESO regional level.

 

Gidawat ni PESO-CDO manager Ms. Kathleen Kate D. Sorilla ug mga personahe sa PESO-CDO ang maong kadungganan nga gihimo atol sa 2025 Mid-Year Assessment nga gipasiugda sa DOLE-X kauban ang PESO- Managers Association of the Philippines – X, Inc. (PESOMAP-X, Inc.).

 

Kini nga pasidungog timaan lang sa paningkamot sa tibuok burukrasya sa dakbayan ubos sa RISE Development Agenda ni Mayor Klarex Uy nga lakip sa tinguha ang makahatag og ‘livelihood & employment opportunities’ sa matag kagay-anon.

 

Alayon niini ang PESO-CDO lakip sa motigi alang sa 2024 National Search for Best PESO atol sa National PESO Congress karong bulan sa Oktubre. (AGP/Photo courtesy of DOLE CDO FIELD OFFICE)