MALAMPUSONG gitapos ang skills fair nga gitawag og Kahigayonan 2025: Piyesta sa Dakbayan: Tabo sa mga Oportunidad Year 4 nga gipahigayon adlaw’ng Miyerkules, Agosto 13, sa Ayala Malls Activity Center, ning siyudad.

 

Kini gitapos pinaagi sa dance competition diin mipasundayag ang mga Out-of-School Youth gikan sa nagkadaiyang barangay, tunghaan ug grupo sa ilang mga talento.

 

Migula nga kampyeon ang Panagsal-aw Performing Guild sa Barangay Kauswagan, 1st runner-up ang Puntod ug 2nd runner-up ang Soulbeat Kinexis sa Cagayan de Oro City National High School-Junior High School.

 

Gawas sa dance competition, ubay-ubay nga skills exhibit and training application ang gitanyag, ingon man livelihood and entrepreneurship assistance scholarship orientation, UY talks kon inspirational talks sa mga kabatan-onan.

 

Sa laing bahin, mipadayag sa iyang dakong pasalamat si Oro Youth Development Officer Officer-in-Charge Lord Saver “Vhaugne” Centina sa suporta nga nadawat gikan sa mga partner agencies sa Oro Youth Development Office.

 

Misalmot usab sa maong kalihokan sila si Sangguniang Kabataan Federation President Kenneth John Sacala, City Councilor Moreno “Jing” Daba IV ug Lorimer Angeles kinsa kanhi president sa Association of Misamis Oriental Technical Vocational Education and Training (AMORTVET), usa ka organization nga nagtutok sa technical-vocational education and training sa Misamis Oriental.

 

Nasayrang mikabat sa dul-an 2,500 ang misalmot sa Kahigayonan Year 4 gikan sa Agosto 11 hangtud Agosto 13.

 

Ang Kahigayonan Year 4 alayon sa kasaulogan sa International Youth Day ug kabahin sa Oro Youth Month nga gisaulog matag bulan sa Agosto.

 

Tumong niini ang paghatag og oportunidad nga makatrabaho ug makakat-on ang mga Out-of/School Youth ning siyudad. (NLB/CIO/ photos by Iren Fuentes/CIO)