Sobra 700 ka mga residente sa Barangay Taglimao ang nakadawat og nagkalain-laing serbisyo gikan sa tibuok burukrasya sa City Hall atol sa Klarex Serbisyo sa Baryo (KSB) niadtong Sabado, Agosto 16.

 

Kini na ang ikatulong higayon nga gipahigayon ang KSB sa barangay ubos sa pagdumala ni Kapitan Ruben Obsioma Sr., kinsa mapasalamaton kang Mayor Rolando 'Klarex' Uy sa iyang walay puas nga suporta ug pagserbisyo.

 

Apil sa programa ang makalingaw nga mga presentasyon, sama sa ika-11 nga entry sa pa-contest ni Mayor Klarex nga giapilan sa mga magtutudlo sa Taglimao Elementary School ug Taglimao National High School.

 

Gipakita nila ang usa ka transformational dance nga nagsugod sa tradisyonal nga sayaw ngadto sa modernong sayaw nga naghiusa sa kultura, tradisyon ug sa modernong porma.

 

Naglakip usab ang KSB og daghang serbisyo sama sa health care, social services, scholarship ug uban pang hinabang alang sa katawhan.

 

Gitapos ang kalihokan pinaagi sa jamming session uban nila Mayor Klarex, mga konsehal, ug department heads diin sila miapil sa pagkanta ug lingaw-lingaw isip kabahin sa matag Sabado nga programa. (MDS/CIO/Photos by: Roel Felicitas & Jhoanne Abejo/CIO)