Nagmalampuson ang gipahigayon nga 1st Mindanao Lechon Roasting Contest nga gipasiugdahan ning syudad ubos sa administrasyon ni Mayor Rolando `Klarex’ Uy nga maoy usa sa mga dagkong kalihokan sa Higalaay Festival alayon sa Kapistahan ni Senior San Agustin karong Agosto 28.

 

Mokabat 20 ka mga partisipante gikan sa nagkadaiyang lugar sa Mindanao ang misalmot diin ang nikampeyon mao ang Dayen’s Lechon gikan sa Tubod, Surigao del Norte nga nakadawat og cash prize nga P100,000.00

1st runner-up ang Mias and Nenen Lechon House ning syudad nga nakadawat og cash prize nga P60 mil.

 

Samtang ang La Mia’s Lechon sa Kidapawan City, North Cotabato mao ang 2nd runner-up nga nakadawat sa cash prize nga P40 mil.

 

Lakip usab sa ilang nadawat ang mga produkto gikan sa B-MEG ug PILMICO nga maoy usa sa mga dagkong sponsors uban sa Pigrolac, United Lechoneros of Cagayan de Oro City Association, Inc. (ULCAI), ug ang Mega Farm.

 

Samtang ang mga non-winners nakadawat og tag P10 mil isip consolation prize.

 

Sa iyang mensahe isip representante ni Mayor Klarex, gipasalamatan ni Chief of Staff Sheila Lumbatan ang tanang misalmot sa 1st Mindanao Lechon Roasting Contest kay nakahatag kini og dugang kasadya sa Higalaay Festival.

 

Gipasalamatan usab niya ang City Veterinary Office sa pagpangulo ni City Veterinarian Dr. Helen Ann Tacandong sa ilang paningkamot aron mapahigayon ang maong kalihokan ug labaw sa tanan ang mga sponsors nga hugot nga nagsuporta hinungdan nga nagmalampuson ang kompetisyon.

 

Ang kalihokan gitambongan nila ni City Councilors Edgar Cabanlas, Al Legaspi, Paolo Gaane, ug Yan Lam Lim, City Administrator Atty. Roy Hilario Raagas, Acting City Information Officer Jade Adecer, ug Acting City Tourism Officer Marky Jalapadan. (ALR/CIO/Photos by Reynan Baylin & Kim Zaldivar/CIO)