MIHAYAG ang kalangitan sa dakbayan kagabii, Agosto 24, sa gipahigayong 3rd Mayor Rolando “Klarex” Uy Pyromusical Competition 2025 sa Rio de Oro Boulevard isip usa ka core events ug highlight sa Higalaay Festival 2025.

 

Liboan ka mga Kagay-anon ug mga bisita sa laing lugar ang midagsa sa Rio de Oro boulevard ug palibot niini aron pagsaksi sa makalingaw nga fireworks display competition karing tuiga.

 

Sa maong kompetisyon, lima ka participating entries gikan sa nagkalain-laing dapit sa Pilipinas ang nagtigi ug nagpasundayag sa ilang mga talento ug kahanas sa firework display nga naghatag og lingaw ug kalipay sa mga manan-away.

 

Ang mga partisipante mao ang Tower Fireworks sa Cotabato City, Orient Star Pyrotechnics sa Borongan, Samar, Bojos Fireworks sa Roxas City, Spectra Illuminator sa Bacolod City, ug Starmines Fireworks nga gikan sa Pandi, Bulacan.

 

Human sa mainit nga kompetisyon, nahimong kampeon ang Tower Fireworks sa Cotabato City, samtang 2nd placer ang Starmines Fireworks sa Pandi, Bulacan ug 3rd placer ang Spectra Illuminator sa Bacolod City.

 

Labing giatangan usab sa mga katawhan ang espesyal nga exhibition show sa garbo sa Cagayan de Oro nga mao ang Chada Fireworks, diin ilang gipasundayag ang modernong kombinasyon sa kahayag ug musika nga nagrepresentar sa kalipay ug panaghiusa sa katawhan ning maong dakbayan.

 

Ang maong kalihokan dili lamang pasundayag sa pyrotechnics apan usa usab kini ka plataporma nga nagpamatuod nga ang Higalaay Festival dili lamang pista sa panaghigalaay, apan usa ka dakong selebrasyon sa kultura ug turismo sa dakbayan sa Cagayan de Oro. (DYM/CIO/ Photos by Kim Zaldivar/CIO)