GIBUKSAN na adlaw'ng Lunes, Agosto 25, ang Kahimunan Trade Fair 2025 sa Ayala Malls Centrio, diin usa sa mga mahinungdanong kalihokan sa Department of Trade and Industry (DTI) Region 10 alayon sa kasaulogan nga nagdala sa tema nga ‘Northern Mindanao’s Creativity, Innovations, and Traditions,’ isip kabahin sa selebrasyon sa Higalaay Festival.

 

Gitambongan kini sa mga opisyal sa DTI lakip mga provincial directors gikan sa Bukidnon, Lanao del Norte, Misamis Oriental, Misamis Occidental, ug Camiguin, kinsa naghiusa aron ipakita ang labing maayo nga mga produkto sa ilang tagsa-tagsa ka probinsya.

 

Mitambong usab sila City Councilor Christopher George Goking, kinsa mao ang Chairman sa Committee on Trade and Commerce ug Co-Chair sa maong trade fair, ug City Administrator Atty. Roy H. Raagas, isip representante ni Mayor Rolando 'Klarex' Uy diin nagpakita kini sa lig-ong suporta sa lokal nga kagamhanan sa kalihokan.

 

Ang Kahimunan Regional Trade Fair usa ka plataporma alang sa mga Micro, Small, and Medium Enterprises (MSMEs) sa rehiyon nga makapasundayag sa ilang mga produkto nga gikan sa processed foods, handicrafts, ug uban pa—sa ingon, makatabang kini sa pagpalambo sa ekonomiya ug pagpalig-on sa diwa sa pagnenegosyo sa Northern Mindanao. (JA/CIO Photos Roel Felicitas)