GIPROKLAMANG KAMPYON ug mihakot sa uban pang mga awards ang barangay Lumbia atol sa Oro Higalaay Street Dancing Competition 2025 nga gipasiugdahan sa kagamhanang lokal pinaagi sa City Tourism and Cultural Affairs Office diha sa Misamis Oriental Integrated Sports Complex, Agosto 26, 2025.

 

Nasakmit sa Lumbia ang kadaugan isip kampyon sa Higalaay Dance Showdown nga adunay premyo nga mokabat 500,000.00, ug kampyon usab sa street dancing nga adunay premyo nga mokabat 50,000.00.

 

Nakadawat usab kini og P20,000.00 nga premyo sa matag special awards nga naangkon nga naglangkob sa Best in Choreography, Best in Production Design ug Best Storyline. Lakip nadawat sa Lumbia ang mokabat 50,000 nga balor sa produkto gikan sa Pocari Sweat ug special cash prize gikan sa Minute Burger.

 

Sa laing bahin nahimong 1st runner up sa Higalaay Dance Showdown ang barangay Lapasan ug modawat sa premyo nga mokabat sa 400,000.

 

Samtang 2nd runner up usab ang barangay Carmen ug naangkon ang premyo nga P300,000. Alang usab sa street dancing, nahimong 1st runner up ang barangay Kauswagan ug modawat sa premyo nga P40,000 ug 2nd runner up ang barangay Carmen nga adunay pa-premyo nga P30,000.

 

Nasakmit usab sa barangay Kauswagan ang titulo isip Best in Costume ug naangkon sa Brgy Gusa ang Best in Musicality award, ug midawat og tag P20,000.00 nga premyo.

 

Ang Higalaay Street Dancing Competition usa sa mga gikahinamang core events matag Higalaay Festival, diin pinaagi sa kulturanhong pasundayag mahulagway ang tipik sa sugilanon, kasaysayan, pagtuo, panginabuhian ug kultura sa Cagayan de Oro.

 

Nasayran moabot sa 10 ka mga barangay ang nagtigi sa street dancing nga gilangkoban sa barangay Bulua, Carmen, Brgy 17, Lumbia, Lapasan, Gusa, FS Catanico, Kauswagan, Pagatpat, ug Pagalungan.

 

Mapasalamaton si City Mayor Rolando ‘Klarex’ Uy sa mga Punong Barangay nga mihatag og dakong suporta alang sa kalamposan sa maong kalihokan.

 

Gihingosgan usab ni Mayor Klarex ang mensahe sa panaghiusa, panaghigalaay ug pagpasalamat kang Senior San Agustin ang Patron sa Cagayan de Oro, diin ang mga kalihokan sa kapistahan pahinungod alang kaniya.

 

Misaksi usab sa kasadya ang mga myembro sa 21st City Council, Chief of Staff Ms Sheila Lumbatan, City Hall department managers, Regional Director Marie Elaine S. Unchuan sa Department of Tourism Region 10, ug uban pang mga dinapit nga bisita. (AGP/Photos by Kim ZaldivarI/Irene Fuentes/Johanne Abejo/April Lorenzana CMO/CIO)