HAWAN na ang sidewalk atubangan sa J.R. Borja General Hospital sa dalan Seriña human boluntaryo nga giguba sa mga namaligya ang ilang mga tindahan atol sa pagsusi sa syudad pinaagi sa road clearing team sa Task Group Demolition, Sept. 1, 2025.

 

Niadtong bulan sa Hulyo nagpahigayon og assessment ang TG Demolition uban sa kadagkuan sa Department of the Interior and Local Government (DILG) sa nagkadaiyang lugar ning syudad lakip na ang Barangay Carmen.

 

Gihatagan usab og notice ang mga namaligya sa maong sidewalk kalabot sa ilang kalapasan diin wala gitugot ang pagtukod og illegal structures sa sidewalk ug kini pagatangtangon.

 

Gawas sa pagpasabot, gihatagan og notice ang mga sidewalk vendors nga mag-clearing ang syudad sa Sept. 1. Hinuon, mapasalamaton ang road clearing team sa syudad kay sa pag-abot nila sa lugar hawan ug wala nay angay gubaon kay boluntaryo na nga giguba sa mga vendors.

 

Alayon niini, gipasalamatan ni Antonio Resma Jr. nangulo sa TG Demolition si Punong Barangay Raineir Joaquin Uy sa Barangay Carmen nga hugot nga nagsuporta sa mga clearing operation sa syudad ubos sa administrasyon ni Mayor Rolando `Klarex’ Uy. (ALR/CIO/Photos by Reynan Baylin/CIO)