HUMAN giabrihan ang JR Borja ug Kiosko Kagawasan Park sa milabay’ng pipila ka bulan, abri na usab karon ang renovated nga Golden Friendship Park atubangan sa Kathryn’s Bake shop ug PanChic Divisoria.

 

Ang maong parke usa lamang sa pipila ka mga ‘phases’ nga naabrihan sa Project Lunhaw nga gisugdan pagtrabaho ilawom sa administrasyon ni Mayor Rolando `Klarex’ Uy.

 

Si Patrick Gabutina, Project Lunhaw Head, mipasabot nga wala pa na-schedule ang formal nga pag-turnover sa Golden Friendship Park apan magdepende kini sa availability sa schedule ni Mayor Klarex.

 

Hinuon sa kinatibuk-an dili pa hingpit ang completion sa Project Lunhaw apan dako na usab ang natrabaho.

 

Nunot niini, kanunay’ng nagpasalamat si Gabutina sa mga hardworking personnel sa Project Lunhaw ug sa City Engineering Office nga walay puas nga pagtrabaho ug paningkamot aron dali nga mahuman ug maabrihan ang parke.

 

Mapahimuslan na usab kini sa katawhan nga gusto mopahulay ug maglingkod-lingkod ingon man mga pamilya nga mosuroy uban sa ilang mga anak. (ALR/CIO/Photos from Project Lunhaw)