Nabugkos ang kaminyoon sa ‎15 ka paresan sa brgy Bonbon human gibalik ni Mayor Klarex Uy ang 'Kasalan ng Bayan' diha sa Barangay Bonbon, adlawng Sabado, Septiyembre 6, 2025.

 

Ang mass wedding nagsilbing highlight matag Klarex nga Serbisyo sa Barrio kon KSB.

‎

‎Ang Kasalan ng Bayan usa ka programa ni Mayor Klarex Uy nga nagtinguha paghatag og katumanan sa pangandoy sa mga magtiayon nga mas mapalawom pa ang ilang panaghiusa ug panaghinigugmaay pinaagi sa balaang sakramento sa kasal.

‎

‎Gipangulohan ni Mayor Klarex Uy ang seremonyas sayo sa kabuntagon diha sa brgy Bonbon Covered Court.

 

Misaksi sa maong free mass wedding program ang 21st City Councilors Jing Daba, Christopher Goking, Al Legaspi Sr., Roger Abaday, Marlo Tabac, Des Dahino, inubanan ni Bonbon Punong Barangay Lelit B. Molina ug barangay officials.

‎

Sama ‎sa naandan, mihatag og gasa ang Pamilyang Uy pinaagi libreng lechon, bino kon wine, ug cake. Naghatag usab og regalo nga bugas sila Kagawad Roger Abaday ug Al Legaspi Sr.

 

Mitunol usab si Punong Barangay sa Carmen Hon. Raineir Joaquin Kapkik Uy og P5000 peso cash isip dugang tabang ug pahalipay sa mga magtiayon.

‎

‎Pinaagi sa Kasalan ng Bayan, mahatagan og kahigayonan ang matag pares nga libreng makasal ingon pa man nga mapalig-on ang pundasyon sa matag pamilya ug ang komunidad. (LRM/CIO photos by Jhoanne Abejo, & Iren Fuentes/CIO video by Roel Felicitas/CIO)