MALAMPUSONG gipahigayon ang ikatulong 'Solidarity Walk' nunot sa Suicide Prevention Awareness Month, adlaw'ng Dominggo, Septiyembre 7, gikan sa Rodelsa Circle hangtud sa Kiosko Kagawasan, ning siyudad.

 

Ang maong 'Solidarity Walk' gitawag og "Baktas sa Panaghiusa: Alang sa Kinabuhi." Kini gisalmotan sa dul-an 3,000 gikan sa mga city scholars, representante sa nagkadaiyang national government agencies, pribadong organisasyon ug kompanya, pribadong indibidwal, school-based organizations, religious organizations, mga buhatan sa city hall ug uban pa.

 

Kini gisundan sa hamubong programa nga gipahigayon sa Kiosko Kagawasan diin gitambongan mismo ni Committee on Social Services Chairperson City Councilor Maximo “Jonjon” Rodriguez III, City Councilor George Christopher Goking, City Councilor Des Dahino, City Councilor Atty. Edgar Cabanlas, CSWD Officer Annie Tongson ug Acting City Information Officer Jade Adeser kinsa mihatag sa ilang tagsatagsa ka mensahe.

 

Samtang, gibutyag ni CSWD Psychosocial Division Head Rio Rosal B. Baliling ang kamahinungdanon sa pagpangayo og tabang sanglit available ug libre ang 24/7 Mental Helpline diin kini matawagan sa numerong 0970-039-2709 (Smart). “Help is available and help is free,” saysay ni Baliling.

 

Sa laing bahin, mipadala sa iyang hugot nga suporta si Mayor Klarex Uy pinaagi sa video message diin siya misaysay nga ang kinabuhi usa ka gasa ug angay hatagan sa bili. "Kauban, ang kinabuhi mahinungdanon. Kini gasa gikan sa Ginoo busa hatagi kini og bili ug ampingi. Ayaw kawad-an sa paglaum," saysay ni Mayor Klarex.

 

Gipasidunggan usab ang largest number participants na ang City Education and Development Office, Most Cheerful ug Creative Banner ang Senior High School sa Cagayan de Oro City National High School.

 

Nasayrang ang 3rd Solidarity Walk inisyatiba sa City Social Welfare and Development (CSWD) Department Psychosocial Division kansang tumong ang pagtabang og promote sa pagsugpo sa kaso sa suicide ning siyudad ning bulan Septiyembre diin gisaulog ang Suicide Prevention Awareness Month.(NLB/CIO/photos by Kim Zaldivar and Reynan Baylin/CIO)