MIDAGSA ang 897 ka molupyo sa Barangay Puntod human gidala ni Mayor Klarex Uy ang People’s Day sa ilang barangay, Septiyembre 8, diha mismo sa Barangay Puntod Covered Court, ning siyudad.

 

Usa sa nakabenepisyo niini si Charity Carlotsa, taga Block 4, Puntod nga nagpasalamat ni Mayor Klarex human nakadawat og medical assistance.

 

“Salamat kang Mayor Klarex Uy nga nakatagamtam mi sa serbisyo sa People’s Day. Salamat kaayo sa iyang gihatag nga hinabang. Happy ming tanan nga naa sya’y nahatag sa amo. Salamat sa tanan, Mayor,” saysay ni Carlotsa.

 

Gisugdan ang People’s Day pinaagi sa flag raising ceremony pinangunahan sa Barangay Puntod council ubos sa pagpangulo ni Punong Barangay Alexis Dacer kinsa nagpasalamat sa pagtubag ni Mayor Klarex sa iyang hangyo nga madala ang People’s Day sa ilang barangay atol sa ilang kapistahan nga saulogon karong Miyerkules.

 

Kini gisundan sa pagpasabot ni Mayor Klarex Uy nga dili niya kinaiya ang magpa-serbisyo apan ang iyang kinaiya mao ang magserbisyo.

 

“Kining People’s Day mao ni ang akong gihatagan og dakong kahigayonan aron mapadayun ang pagserbisyo ug mahiduol ang serbisyo sa gobyerno sa katawhan ug mahiduol ang katawhan sa gobyerno. Sukad sa akong unang panglingkod hangtud karon, ako inyong sulogoon hangtud karon suloogoon gihapon kay dili nako kinaiya, kalipay nako nga ako ang inyong serbisyohan.

 

Ako ang moserbisyo kaninyo busa duna’y People’s Day, duna’y SurUY SurUY sa baryo, ug duna’y Klarex nga Serbisyo sa Baryo, tanan gihatag na sa katawhan aron mahibalik ang paglaum ug pagsalig sa gobyerno nga aduna sila’y madangpan, mahangyoan, mapangayoan sa panahon nga ang katawhan aduna’y gikinahanglan,”saysay ni Mayor Klarex.

 

Lakip sa batakang serbisyo na natagamtaman sa mga taga barangay Puntod ang libreng check-up, tambal, duha ka kilo nga bugas, wheelchair ug pagtubag sa inquiry kabahin sa scholarship, job application, late birth registration, renewal of business permit ug uban pa.

 

Sa laing bahin, mitambong sa People’s Day sila si City Councilor Gigi Go, City Councilor Atty. Edgar Cabanlas, City Councilor Maximo Jonjon Rodriguez III, City Councilor Dok Paolo Nicolo Gaane, City Gouncilor Enrico Salcedo, City Councilor Alam Lim ug kanhi City Councilor Alexander Dacer.

 

Ang Barangay Puntod mao ang pinakaunang barangay diin gidala ang People’s Day sa bulan sa Septiyembre kansang tumong sa administrasyon ni Mayor Klarex Uy ang mapaduol ang serbisyo sa gobyerno sa katawhan sa mga kabaranggayan. (NLB/CIO/photos by Jhoanne Abejo and Kim Zaldivar/CIO)