MALAMPUSONG gipahigayon sa National Commission of Senior Citizens Region 10 karong adlawa, Septiyembre 13, 2025 diha sa City Tourism Hall ang cash gift distribution & caravan of services alang sa mga senior citizens nunot sa "Handog ng Pangulo: Serbisyong Tapat Para sa Lahat" agi'g pagsaulog sa adlawng natawhan ni President Ferdinand 'Bongbong' Marcos Jr.

 

Moabot sa 70 ka mga senior citizens sa Cagayan de Oro nga nag-edad sa untop 80, 85, 90 ug 95 anyos ang mga nakadawat sa 10,000 pesos cash subay sa Republic Act 11982 kon Expanded Centenarian Act.

 

Gipangulohan ni NCSC 10 Regional Director Ms. Mary Jean Asum ang programa kauban ang City Social Welfare and Development Office, ug Office for Senior Citizens Affairs Head Capt. Douglas Dabatian.

 

Mipasalig usab si City Councilor Gilda Go, chairperson sa Committee on Senior Citizens, kauban sa liderato ni Mayor Rolando 'Klarex' Uy nga sa kanunay magpadayon ang hugot nga suporta sa kagamhanang lokal sa mga programa sa senior citizens sa syudad.

 

Nagpahigayon usab og serbisyong-medikal ang buhatan sa City Health Office ug City Health Insurance Office sa maong kalihokan. (AGP/Photos by Reynan Baylin & Roel Felicitas/CIO)