MAPASALAMATON ug gikalipay sa taga Barangay Bayanga nga gihatagan og higayon ni Mayor Rolando Klarex Uy sa pagbisita ug mahatagan og batakang serbisyo gikan sa city hall dala sa programang People’s Day inubanan sa pagpahigayon sa flag raising ceremony adlaw’ng Lunes, Septyembre 15 ning tuig.

 

Usa sa nakabenepisyo si Jessa Panugaling, molupyo sa Barangay Bayanga, 27 anyos, usa ka PWD, minyo ug anaay pito ka bulan nga anak, nga mismo miduol kang Mayor Klarex bisan pa man sa kahimtang aron matabangan sa financial nga panginahanglanon susama sa pagpalit diaper ug bugas.

 

Dako ang pasalamat ni Jessa nga natabangan ni Mayor Klarex pinaagi sa paghatag og bugas, wheelchair ug financial assistance.

 

Nasayran nga ang People’s Day usa ka one-stop-shop sa nagkadaiyang serbisyo sa city hall sama sa paghatag assistance sa scholarship ug job application diin mahatagan og higayon nga makakitag trabaho ang katawhan nga nanginahanglan ug lakip usab paghatag og libreng bugas, wheelchair, check-up ug medical assistance.

 

Tungod niini, mapalasamaton si Punong Barangay Felipe P. Baang kang Mayor Klarex. “Dili najud maglisod ang senior citizen moadto sa city hall kay ania na sa atong tugkaran ang mga batakang serbisyo sa city hall.”

 

“Hangtud nga anaa pay mga katawhan nga nangayog hinabang, amo nang serbisyohan.” saysay ni Mayor Rolando Klarex Uy.

 

Sa padayon nga pagpatuman sa programang People’s Day nga gipangulohan ni Mayor Klarex, mas daghan pang barangay ug mga indibidwal ang makasiguro nga makadawat sa patas ug libreng serbisyo, bisan pa man sa kondisyon o sa kalayo gikan sa sentro sa dakbayan. (DYM/CIO/Photos by Iren Fuentes, Roel Felicitas and Jhoanne Abejo/CIO)