Mokabat 72 ka pamilya nga nasunogan diha sa Barangay 24 ang nakadawat og Emergency Housing Assistance gikan sa National Housing Authority (NHA) nga gipahigayon sa covered court sa Barangay Macabalan, Huwebes Sept. 18, 2025.

 

Si Mayor Rolando `Klarex’ Uy ug NHA –X Officer-In-Charge Regional Manager Homer T. Cezar ang nangulo sa pagtunol sa P20,000.00 matag pamilya isip emergency housing assistance.

 

Nasayran nga si Mayor Klarex mismo ang nihangyo sa mga kadagkuan sa NHA nga matabangan ug mahatagan og assistance ang mga pamilya nga nasunogan niadtong Hunyo 2, 2025, aron hinayhinay nga makabalik og tukod sa ilang panimalay.

 

“Magamay man o madako ang importante naay madawat ug angay magpasalamat sa nadawatan,” pamahayag ni Mayor Klarex.

 

Nunot niini, gipasalamatan ni Mayor Klarex ang mga kadagkuan sa NHA nga nagpakabana ug naningkamot aron madawatan sa mga biktima ang cash assistance.

 

Samtang sa iyang mensahi, gipahinumduman ni Engr. Cezar ang mga benepisyaryo nga gamiton sa insakto ang ilang nadawat nga cash assistance. (ALR/CIO/Photos by Iren Fuentes/CIO)