DILI matugkad ang kalipay sa duha ka binuhat nga sulod sa 43 ka tuig nga panag-ipon, hingpit nang gibugkos sa kaminyon ang ilang panag-uban pinaagi sa espesyal nga kasal nga gihatagan og katumanan ni Mayor Klarex Uy.

 

Usa ka mabulokon ug talagsaon nga higayon, adlaw’ng Martes, Septiyembre 30 ang miabot sa kinabuhi ni Alfredo Valdoz, 80 anyos ug Salome Pacamo, 65 anyos mga molupyo sa Purok 3, Zone 10 Upper Carmen ning dakbayan dihang mismo si Mayor Klarex ang mibisita ug sa ilang pinuy-anan dala ang katakus nga hiusahon sila sa kaminyoon isip tubag sa ilang hangyo.

 

Simple ug yano nga selebrayon lamang ang ilang gidalit sa mga misaksi sa ilang panaghiusa sa kaminyoon kauban sa pipila ka mga department managers ug empleyado sa city hall apan nakahatag usab kini og lawom nga mensahe kanila.

 

Ang mensahe sa hugot nga pagtuo ug pagsalig, pagpasaylo ug kanunay nga pagpili sa usag-usa bisan pa man sa daghang pagsulay ang hinungdan ug sikreto ni Tatay Alfredo ug Nanay Salome nga angay panaminan sa mga magtiayon nga naninguha nga molungtad ang ilang paghigugmaay ug panaghiusa.

 

Ang maong kasal nagpakita lamang nga walay gitakdang panahon ang “forever” ug nga ang gugma mahimong magmalungtaron kung kini ubos sa gugma ug puno sa pagpasaylo. (DYM/CIO/Photos by April Lorenzana/CMO)