NAPULO (10) ka mga barangay biosecurity ug mga staff gikan sa upat ka barangay ning syudad ang mitapos sa duha ka adlaw nga barangay vaccinator training sa City Veterinary Office.

 

Ang mga gibansay nga gikan sa Barangays Puerto, Tablon, Bugo ug Agusan ang midawat sa ilang certificate atol sa gipahigayon nga Animal Welfare Week Forum Miyerkules Okt. 1, 2025, sa Limketkai Center.

 

Si Dr. Helen Ann Tacandong, namahayag nga ang mga barangay vaccinators ang ilang katimbang kung magpahigayon sila og mass vaccination sa anti-rabies sa ilang tagsa-tagsa ka mga barangay isip mga force multipliers sa City Vet.

 

Samtang gipasabot usab ni Dr. Jiff Nasses Velasco, section head, vaccination and other veterinary services, Animal Health Division sa City Vet nga dili makabakuna ang mga barangay vaccinator kung walay kalihokan ang ilang buhatan ug walay mga veterinarian nga maka-supervise.

 

Siya midugang nga kung makita nga maayo ang resulta sa pagbansay og mga vaccinators ug mas modoble ang ihap sa mga iro nga mabakunahan laing hugna na usab sa barangay vaccination training ang ilang himoon alang sa laing mga barangay. (ALR/Photos by Reynan Baylin/CIO)