USA ka send-off dinner ang gitanyag sa kagamhanang lokal sa pagpangulo ni Mayor Klarex Uy alang sa mga delegado nga mosalmot sa Batang Pinoy 2025, niadtong Huwebes, (Oktubre 23) sa City Tourism Hall.

 

Ang kalihokan gipahinungod isip pagdasig ug pasalamat sa mga batang atleta nga modala sa ngalan sa dakbayan sa umaabot nga nasudnong kompetisyon.

 

Sa mensahe ni Mr. Alby Cris D. Waga, hepe sa delegasyon ug City Sports Office, iyang gipadayag ang iyang dakong garbo ug pagsalig sa mga atleta, ug nag-awhag kanila nga ipadayon ang kaisog ug determinasyon sa dula.

 

'Go, Team Cagayan de Oro! Bring home the victory and make our city proud!' matud pa niya.

 

Gipasalamatan usab ang mga coaches ug ginikanan sa ilang suporta, paningkamot, ug giya sa pagpangandam sa mga kabatan-onan.

 

Naghatag usab ug mensahe si SK Federation President Kenneth John Sacala, diin iyang gidasig ang mga atleta nga magpabilin nga mapaubsanon, disiplinado, ug puno sa kadasig samtang nagdala sa bandil sa dakbayan.

 

Samtang gipasalamatan usab sa delegasyon ang suporta ug inspirasyon ni Mayor Klarex sa ilang paningkamot. (MDS/Photos Courtesy to City Sports Office)