PINAKAUNANG payout alang sa 1,000 ka indigent solo parents sa Cagayan de Oro ang gipahigayon sa administrasyon ni Mayor Klarex Uy, Oktubre 29, diha sa Barangay 40 covered court, ning siyudad, diin ang matag usa midawat og P7,000 subsidy alang sa bulan sa Hunyo 2024 hangtud Disyembre 2024.

 

Nasayrang mikabat sa 557 ka indigent solo parents ang nakadawat sa District 2, samtang laing 443 sa District 1 ang gilaumang makadawat karong Oktubre 31 diha sa Barangay 40 covered court.

 

Ang maong payout subay sa Republic Act No. 11861 o Expanded Solo Parents’ Welfare Act.

 

Lakip sa nahimong instrumento sa maong payout sila si Mayor Klarex Uy, Committee on Women and Family Relations Chairperson City Councilor Des Dahino, uban sa iyang Co-Chair, City Councilor Gigi Go, ug Committee on Social Services Chairperson City Councilor Jonjon T. Rodriguez.

 

Ang maong inisyatiba nahimong posible pinaagi sa City Social Welfare and Development (CSWD) nga gipangulohan ni CSWD Officer Anecia C. Tongson ug CSWD Solo Parents Section pinangulohan ni Mary Apple Dawn Tabafa.

 

Tumong niini nga mahatagan sa kadasig ug ginagmay’ng tabang ang mga solo parents, ilabina sa nasinatiang kalisud sa inusarang pag-atiman sa ilang mga anak. (NLB/CIO/photos courtesy of MKU PR)