SA TINGUHA nga mapalambo ang panginabuhi sa mga Homeowner’s Associations (HOAs) gikan sa nagkadaiyang relocation sites ning syudad, hugot nga gisuportahan sa administrasyon ni Mayor Rolando `Klarex’ Uy ang ilang livelihood program.

 

Gani, gihatagan sila og higayon nga maka-display sa ilang mga produkto diha sa city hall mini park sugod niadtong adlaw’ng Lunes, Oktubre 27, 2025.

 

Ang Indahag Habitat Phase 2 nga HOA nagdisplay sa ilang produkto nga classic spinach-style sardines; silk worm usab ang sa Cagayan de Oro Resettlement Socialized Housing Project – 4 (CDORSHP-4) Barangay Balubal.

 

Samtang hollow blocks usab ang HOA CDORSHP-3 sa Barangay Iponan, ug rugs o mga trapo ang produkto sa HOA sa Gawad Kalinga Shell sa Calaanan Barangay Canitoan.

 

Ang kalihokan gihingusgan sa City Housing and Urban Development Department (CHUDD) sa pagpangulo ni Acting Department Manager John Asuncion alayon sa tinguha ni Mayor Klarex nga mapalig-on ug mapalambo ang panginabuhi sa mga molupyo diha sa nagkadaiyang relocation sites alang sa ilang tagsa-tagsa ka pamilya. (ALR/CIO/Phptos by Reynan Baylin/CIO)