GIKALIPAY ni Mayor Klarex Uy ang pag-anunsyo nga madawat na sa mga empleyado sa city hall ang balor 65% sa ilang sweldo isip Performance Based Bonus tungod sa Seal of Good Local Governance (SGLG) nga nasakmit sa syudad sa tuig 2023.

 

Matud ni Mayor Klarex, una nang gipahibalo ni City DILG Director Elaine Josephine Depaur kaniya nga mahimo na i-release ang 65% nga PBB subay sa SGLG award karong Disyembre.

 

Madawatan usab sa mga regular nga empleyado ang Service Recognition Incentive (SRI) nga balor og P10, 000 samtang P7,000 usab nga Gratuity alang sa job order employees.

 

Subay niini, gipasalamatan ni Mayor Klarex ang 21st City Council pinangulohan ni Vice Mayor Jocelyn “Bebot” Rodriguez sa ilang pag-aproba sa Supplemental Budget No. 2 alang sa maong katuyoan.

 

Hinoon, gipasabot sa City Budget Office nga mag-agad gihapon sa direktiba o' tukmang panugot gikan sa nasudnong kagamhanan ang pagpanghatag sa maong mga bonuses. (CIO/Photos by Reynan Baylin, Jhoane Abejo/CIO)