NAGPASALAMAT ang 126 ka mga paleros, nga una nang gikontrata sa syudad, sa gipahigayong cash for work pay-out adlaw’ng Miyerkules, Nobyembre 26 pinaagi sa City Social Welfare and Development (CSWD) Department.

 

Gani man, mapasalamaton si Rodrigo Tapang taga Zone 12, Sitio Manonmano, Carmen kinsa usa mga paleros nga midawat sa iyang suholan.

 

“Nalipay gyud ko kay bisag gamay ra ang sweldo dako na kaayo ni og ikatabang sa amoa. Padayun lang sa imo maayo nga buhat, Mayor. Pasalamat ko ni Mayor Klarex Uy kay nahatag na ang among sweldo,” saysay ni Tapang.

 

Ang mga paleros gikontrata nga motrabaho isip manglimpyohay sa nagkatag nga basura sa siyudad sa milabay’ng mga bulan.

 

Sila midawat og P300 matag adlaw sa ilang pagpanerbisyo sugod sa bulan sa Agosto hangtud bulan sa Septiyembre.

 

Sumala sa City Local Environment and Natural Resources Office (CLENRO), mokabat sa 126 ka paleros ang nakuha sa siyudad.

 

Samtang mapasalmaton usab si Mayor Klarex Uy sa matag usa kanila sa ilang paningkamot ug pagtabang sa pagkab-ot sa limpyo nga siyudad. (NLB/photos by Roel Felicitas/CIO/ Transciption by Rotary Youth City Information Officer Rey Xavier Aba)