NAGPAHIGAYON og symposium ug random Drug Testing alang sa mga Probationers ug Parolees ang siyudad uban ilang pamilya adlaw Miyerkules, Nobyembre 26, diha sa City Tourism Hall.

 

Ang kalihokan gipasiugdahan sa Cagayan de Oro City Parole and Probation Office ubos sa liderato ni CPPO Grace Young-Parrel sa Department of Justice. Kini alayon sa pagsaulog sa 18-day Campaign to End Violence Against Women (VAW), National Children’s Month ug Drug Abuse and Prevention Control (DAPC) Week.

 

Ang symposium nagtinguha nga makatabang sa pagpaambit og kahibalo alang sa tanan aron matukod ang usa ka luwas nga komunidad o VAW-free community, ug maghatag sa klarong direksyon alang sa positibo nga pagbag-o sa kinabuhi.

 

Gipasabot usab sa maong kalihokan ang importansya sa paglikay sa lain-laing bisyo, diin usa sa mga highlight sa symposium ang pagpahigayon og random drug testing ubos sa tabang sa City Anti-Drug Abuse Division-Oro Wellness Center, nga nagpakita sa seryosong paningkamot sa pagmonitor ug pagiya sa mga parolees ug probationers ngadto sa limpyo, himsog, ug responsable nga pagkinabuhi.

 

Mitambong usab sa maong kalihokan si Jann Guillemore Actub kinsa mipresentar ni Mayor Klarex Uy, Atty. Ma. Nimfa Tamparong, Public Attorney IV sa PAO Cagayan de Oro City District Office ug Intelligence Officer II, Michael Brandon Abarquez sa PDEA Misamis Oriental Office, isip mga keynote speakers.

 

Pinaagi sa maong kalihokan, gilauman nga mas mapalapad ang suporta ug kahibalo sa mga pamilya aron magtinabangay batok sa abuso ug pagbuo sa usa ka mas luwas ug mas lig-on nga komunidad. (DYM/Photos by Johnel Neri/CIO)