GIBANSAY sa City Social Welfare and Development (CSWD) Department ang Barangay Mental Health Workers ning siyudad kalabot sa mental health, adlaw’ng Miyerkules, Nobyembre 26.

 

Atol sa maong kalihokan, gipasabot sa mga partisipante ang kalabot sa Mental Health ug pagtumbok sa red flags ug mga pamaagi sa pagdala niini sa clients nga aduna’y Basic Psychiatric needs ingon man ang mga lakang sa pag-refer sa mga clients sa mga facility nga ga-cater og mental health consultation sama sa Northern Mindanao Medical Center (NMMC) alang sa Psychiatric Consultations, JR Borja General Hospital alang sa Telepsychiatric Consultations uban sa mga mental health services nga gitanyag sa City Health Office. Gihisgutan usab ang pamaagi sa pag-incorporate sa trauma-informed care.

 

Sa laing bahin, mitambong sa kalihokan sila si City Councilor Maximo “Jonjon” Rodriguez III kinsa mao’y chairperson sa Committee on Social Services ug City Councilor Dok Paolo Gaane kinsa Committee on Health Chairperson. Prayoridad sa siyudad ang ma-atiman ang mental health sa mga Kagay-anon.

 

Gani tumong sa training nga madugangan ang kahibalo ug mabaid ang kahanas sa mga barangay mental health workers ingon man nga sila ang pinakaduol nga dangpanan sa matag usa gawas sa pamilya ug eskwelahan. (NLB/photos by Iren Fuentes/CIO and photos courtesy of CSWD Psychosocial Unit)