DUHA (2) ka unit sa interactive board ang gi-instalar ug gitunol sa lokal nga kagamhanan pinangulohan ni Mayor Rolando 'Klarex' Uy, pinaagi sa Local School Board (LSB) nga gipangulohan ni Dr. Alicia Anghay, adlawng Huwebes (Nobyembre 27) sa Carmen Science High School (CSHS).

 

Ang maong smart board magamit sa paghimo Og interactive ug makalingaw nga mga leksyon pinaagi sa pagkonektar niini sa computer ug projector.

 

Ang mga magtutudlo mahimong maka-annotate sa digital content, ug ang mga estudyante makapartisipar pinaagi sa pagamit sa ilang tudlo ngadto sa smart board.

 

Ang kalihokan gisaksihan nila Jann Guillmore Actub, spokesperson ni Mayor Klarex, mga staff sa LSB, opisyal sa DepEd ug mga magtutudlo, SPTA president, ug pipila ka mga senior high school students sa CSHS.

 

Dumdoman nga ang maong eskwelahan bag-o pa lamang natukod niadtong Hulyo 24, 2024, ug karon pa lamang nagsugod sa operasyon.

 

Anaa kini’y 60 ka estudyante sa junior high school ug 27 ka estudyante sa senior high school.

 

Tungod kay kini usa ka bag-ong science high school, dako ang panginahanglanon niini sa technological nga mga gamit ug ekipo aron mas mapaayo pa ang pagkat-on sa mga estudyante ilabi na alang sa ilang specialized curriculum.

 

Busa, mapasalamaton si Christopher Andrew Alda, ang school head sa Carmen Science High School, sa duha ka unit sa smart board nga gi-turnover sa lokal nga panggamhanan, diin kini magamit ilabi na sa ilang robotics, mathematics, ug uban pa nga mga subjects. (MDS/CIO/Photos by: Kim Zaldivar/CIO)