SA padayong paningkamot sa lokal nga kagamhanan nga makab-ot ang lig-on ug malungtarong sektor sa agrikultura ning dakbayan, miabag ang City Agricultural Productivity Operations Office (CAPOO) sa insurance payout gikan sa Philippine Crop Insurance Corporation (PCIC), adlawng Biyernes, Nobyembre 28, ning tuig.

 

Ang maong payout naghatag og kahigayonan sa bag-ong batch sa mga mag-uuma gikan sa Brgy Tablon, Balubal, ug Bayanga diin tumong niini nga mamahimong praktikal nga pamaagi sa pagpanalipod batok sa mga risgo nga may kalabotan sa klima ug dili matag-an nga kawad-an sa pananom.

 

Gipangunahan ni City Agriculturist Engr. Bernie Daba Jr. ug inubanan ni Mr. Jan Michael Flores, ang Agricultural Extension Section Chief sa Agronomy Division, ang maong payout nga naghatag og dugang suporta ug kadasig sa mga mag-uuma nga makabangon ug makapadayon sa ilang panginabuhian taliwala sa mga hagit.

 

Nangusog ug nag-aghat ang lokal nga kagamhanan ug PCIC ngadto sa mga mag-uuma ning siyudad sa pagpa-enroll sa maong insurance.

 

Mamahimong mudalikyat sa tagsa-tagsa ka mga Barangay Extension Worker (BAEW) coordinators alang sa dugang kasayoran. (LRM/CIO photos from CAPOO)