Nangandam na karon ang kagamhanan sa Cagayan de Oro sa tinuig nga business permit registration and renewal nga ipahigayon sa Business One-Stop Shop (BOSS) diha sa City Tourism Hall.

 

Sa usa ka coordination meeting, Disyembre 4, gibutyag ni Mr. Jason Adaza, hepe sa Business Permits and Licensing Division (BPLD) sa City Mayor’s Office, nga gibana-banang 30,000 ka mga establisemento sa dakbayan ang gilaumang maglukat sa ilang business permit sunod tuig.

 

Dugang pa ni Adaza nga abri gihapon ang BOSS bisan og weekend aron mahatagan og igong panahon ang mga negosyante sa dakbayan nga maka-renew sa ilang business permit.

 

Gawas pa niini, plano usab sa BPLD nga lugwayan gihapon ang ilang ‘operating hours’ hangtud ala-7:00 sa gabii matag adlaw’ng Lunes hangtud Biyernes aron ma-akomodar kadtong mga aplikante nga buot maglukat sa business permit o’ kaha magparehistro sa bag-ong negosyo.

 

Samtang, gidaseg ni Adaza kadtong gusto magpa-renew sa ilang business permit sa paggamit sa online billing and payment system sa City Finance Department pinaagi niini nga link: citytreasurer.cagayandeoro.gov.ph aron dili na mahasol pagdalikyat sa city hall.