KALINAW, kalipay ug panaghiusa ang sentro sa mensahe ni Mayor Rolando 'Klarex' Uy atol sa 'Pasko de Oro Grand Launching 2025', Martes sa gabii sa city hall, Disyembre 9, uban sa tema: 'Beyond Higala… Pamilya!'

 

Matud ni Mayor Klarex ang tinood nga espiritu sa Pasko mao ang kinasing-kasing nga pagtabang ug pagpakita sa gugma sa imong isig katawo.

 

Mapasalamaton usab ang mayor sa tanang mga grasya ug panalangin nga nadawat sa dakbayan sa Cagayan de Oro sulod sa tuig, ug malaumon kini nga ang kalinaw, panaghiusa ug pagtinabangay ang mopatigbabaw kanunay alang sa dugang kalamboan sa syudad.

 

Sa iyang bahin, si Councilor Joyleen Mercedes Balaba, chairperson sa Committee on Tourism, nagkanayon nga giandam na sa syudad ang tanang mga kalihokan alang sa bulan sa kapaskohan karong Disyembre.

 

Ang mga aktibidades nakatutok sa paghatag sa kalipay ug kasadya alang sa mga Kagayanon, mga bisita ug dumuduong sa dakbayan, pasabot ni Balaba.

 

Lakip sa mga kalihukan sa usa ka bulan nga selebrasyon mao ang Higalaay Holiday Market diha sa Rio de Oro Boulevard; Marching Band Competition sa Disyembre 10 ug Bangga sa Daygon sa Disyembre 11 nga pagalangkoban sa pipila ka mga public schools ug usa ka private school.

 

Lakip usab niini ang Paskorela Caravan nga naghatag og libreng sakay sa pipila ka mga ruta palibot sa syudad.

 

Usa sa nahimong highlight sa grand launching mao ang 'Unveiling of the 75th Charter Anniversary Diamond Jubilee Commemorative Stamp' ug ang pagpasiga sa executive building. (MDS/CIO/Photos by: Jhoanne Abjeo/CIO)