Cash prize balor P60,000 ang naangkon sa mga tinun-an sa Lumbia Central School Drum and Lyre Corps human nahimong kampeyon ug ‘Best in Musicality’ awardee sa Marching Band Competition 2025 adlaw’ng Miyerkules, Disyembre 10, nunot sa 'Pasko de Oro 2025: Beyond Higala.. Pamilya!'.

 

Nasakmit usab sa Blazing East Drum and Lyre Corps - East City Central School ang second prize nga P40,000 plus trophy, lakip ang duha ka special awards nga nagkantidad P5,000 matag usa alang sa ‘Best Band Major’ ug ‘Best Band Majorette’.

 

Balor P30,000 usab ang nadawatan sa Kauswagan Central School Drum and Lyre Corps isip third runner up, samtang P10,000 consolation prize matag usa ang nakuha sa mga non-winners.

 

Nasayran nga siyam ka mga pampublikong tunghaan sa elementarya sa dakbayan ang misalmot sa Marching Band Competition karong tuiga nga gilangkoban sa North City Central School Marching Band, Blazing East Drum and Lyre Corps - East City Central School, Kauswagan Central School Drum and Lyre Corps, Lumbia Central School Drum and Lyre Corps, Gusa Elementary School Drum and Lyre Corps, Upper Carmen Elementary School Drum and Lyre Corps, Verdant Phantoms Drum and Lyre Corps - Macabalan Elementary School, San Simon Elementary School Drum and Lyre Corps ug West City Central School Drum and Lyre Corps.

 

Sa laing bahin, gipresentar usab ang 15 ka mga unit sa motorela nga gi-adornohan sa tema sa pasko nga gi-disenyo sa Oro Creatives isip kabahin sa ‘Paskorela’, kon paghatag og libreng sakay gikan Disyembre 10 hangtod Disyembre 12, ala-1:00 hangtud alas-2:00 sa hapon.

 

Mitambong usab sila Ms. Sheila Lumbatan, Chairperson sa Pasko de Oro 2025, ug City Councilor Christopher George Goking sa maong kalihokan.

 

Ang Marching Band Competition usa sa tinuig nga kalihokan sa Pasko de Oro 2025 aron makahatag sa kabibo ug kasadya sa mga Kagayanon ning kapaskohan. (DYM/CIO/Photos by Kim Zaldivar, Nathan Galleros, Jhoanne Abejo ug Iren Fuentes/CIO)

#CdO@75