MISAKSI si City Mayor Rolando 'Klarex' Uy sa payout sa unang batch sa Integrated Disaster Shelter Assistance Program sa Department of Human Settlements and Urban Development (DHSUD-10), adlaw’ng Miyerkules, Disyembre 10 diha sa buhatan sa DHSUD nga nahimutang sa Gateway Tower ning syudad.

 

Nasayran nga 65 ka benepisyaryo kinsa biktima sa natural nga katalagman sama sa sunog, baha, landslide, ug uban pa ang nakadawat og cash aid nga mobalor sa tag-P10 mil hangtud P30 mil matag usa.

 

“Adunay gobyerno nga naghuna-huna sa inyong nasinati nga katalagman. Dili man paigo ang emergency cash assistance apan dako na kining tabang aron maka-uswag kamo ug makapadayon sa kinabuhi bisan pa sa kalisdanan nga inyong naagian,' pamahayag ni Mayor Klarex.

 

Ang laing payout alang sa ikaduhang batch nga langkoban sa 107 ka benepisyaryo ipahigayon karong umaabot Biyernes, Disyembre 12, diha gihapon sa buhatan sa DHSUD-10. (MDS/CIO/Photos by Reynan Baylin/CIO)