ABRI ug mapahimuslan na og balik ang Port Area Gate 5 diha sa Valenzuela Road o mas naila nga Port Agora Road human kini opisyal nga gibuksan sa publiko adlaw'ng Miyerkules, Disyembre 10, diha sa Macabalan Port ning siyudad.

 

Nasayrang tuig 2017 panahon sa Marawi Siege, gisirad-an ang maong gate para masiguro ang hugot nga seguridad sa pantalan. Tungod niini, ang gate 3 sa Macabalan port ang nagsilbing exit ug entry area lamang.

 

Matud ni PPSupt Medardo Sosobrado Jr, ang OIC sa PPA Port Management Office Cagayan de Oro City, gi-abrihan og balik ang Gate 5 sa publiko aron makatabang pagsulbad sa trapiko nga kasagaran masinati sa Corrales area.

 

Personal usab kining gi-inspeksyon ni City Administrator Atty. Roy Raagas ug City Engineer Joel Momongan aron masuta ang kahapsay sa reopening.

 

Ang Gate 5 sa pantalan mag-operate gikan alas 6 sa buntag hangtod alas 10 sa gabii, ug abli na kini isip entry ug exit point sa mga loaded ug empty containers, empty trucks, ug private vehicles basta adunay ipakitang stickers nga magsilbing entry pass. (DYM/CIO/Photos by Johnel Neri/CIO)