MIPAILAWOM ang mga empleyado sa kagamhanang local ning syudad sa usa ka Anti-Bastos Law Orientation adlaw’ng Huwebes, Disyembre 11 ning tuig alayon sa 18-day Campaign to End Violence Against Women.

 

Ang Anti-Bastos Law o RA 11313 usa ka balaod nga naghatag og proteksyon sa mga kababayen-an batok diskriminasyon ug pang-abuso.

 

Ang maong programa gi-organisar sa JR Borja General Hospital (JRBGH) Gender and Development (GAD) pinangulohan ni Ms. Helen Grace ‘Peanuts’ Uy, JRBGH Women and Children Protection Unit (WCPU) ubos sa pagpangulo ni Dra. Aileen Labadan & Dra. Eugene Amorizado, JRBGH Kalalakihang Tapat sa Responsibilidad at Obligasyon sa Pamilya (KATROPA) ubos sa pagpangulo ni Dr. Arbeen Laurito, og City Inter-Agency Council Against Trafficking and Violence Against Women and Children (CIACAT-VAWC) sa Cagayan de Oro City.

 

Gisalmotan ang maong programa ni City Administrator Atty. Roy Raagas isip representante ni Mayor Rolando ‘Klarex’ Uy diin iyang gipasabot nga ang tanan adunay responsibilidad paghatag og proteksyon sa mga kabataan ug kababayen-an.

 

Aron mas klaro ang pagsabot sa balaod, gisaysay ni Assistant City Prosecutor Jerefe T. Bacang ang Safe Spaces Act ug Anti-Harassment Law, samtang gibatbat usab ni Special Investigator III Lady May G. Delos Santos-Castaños ang mga silot, penalty, ug mga obligasyon sa mga empleyado sa gobyerno ubos sa RA 11313 (Safe Spaces Act) ug sa Anti-Sexual Harassment Law. (DYM/CIO/Photos by courtesy to the JRBGH WCPU & Kim Zaldivar/CIO)