Gipahalipayan ni Mayor Rolando ‘Klarex’ Uy ang banggiitang chess player sa Cagayan de Oro nga si Woman FIDE Master Ruelle ‘Tawing’ Canino human gipasidunggan sa mga opisyales sa syudad atol sa flagraising ceremony sa city hall, Lunes sa buntag.

 

Malaumon si Mayor Klarex nga ang naangkon nga kadungganan ni Canino magsilbing inspirasyon sa mga batan-ong atleta sa syudad, ilabina sa natad sa dulang chess.

 

Lakip sa dakong kalampusan ni Canino nga naghatag sa talagsaong garbo ug dungog sa Cagayan de Oro mao ang paghakot og duha ka bronze medals (mixed team standard ug women’s team rapid) sa milabay’ng 33rd Southeast Asian Games (SEA Games 2025) sa Thailand niadtong bulan sa Disyembre.

 

Giila usab si Canino isip ‘most bemedalled chess player’ sa 2025 Batang Pinoy Games didto sa General Santos City human mihakot og unom ka gold medals sa girls’ under-17 division — standard, rapid, blitz, Fischer Random rapid 960, blitz 960 ug ASEAN chess blitz. (CIO/photo by Reynan Baylin)