SA pagbukas sa bag-ong tuig, unang higayon sa People’s Day Program ni Mayor Rolando ‘Klarex’ Uy sa tuig 2026, gidagsa sa daghang Kagay-anon diha sa City Hall Quadrangle adlaw’ng Miyerkules, Enero 7 ning tuig.

 

Nasayran nga mikabat og 10,427 ka mga Kagay-anon ang nakabenepisyo ug naserbisyohan sa People’s Day Program ni Mayor Rolando ‘Klarex’ Uy sa tuig 2025, diin usa kini ka dakong garbo sa siyudad nga makita ang matinud-anong saad ug tumong ni Mayor Klarex nga mapaduol ang batakang serbisyo sa gobyerno sa katawhan, ilabina sa mga nanginahanglan og tabang.

 

Gilauman nga sa umaabot nga mga People’s Day, mas mapalapad pa ang serbisyong adunay kasingkasing ug kalidad nga ihatag aron mas mapalig-on ang pagsalig sa katawhan ug mas mapaduol pa ang gobyerno sa komunidad, ilabina sa mga lagyo nga katawhan ug kabaranggayan.

 

Gitanyag sa People’s Day ang libreng batakang serbisyo nga check-up, tambal, 5kls nga bugas nga personal nga donasyon sa pamilya Uy, wheelchair, renewal of business permit, pagtubag sa mga inquiry kabahin sa late birth registration, scholarship, job application ug uban pa.

(DYM/Photos by Jhoanne Abejo and Kim Zaldivar/CIO)