ALAYON sa pagsaulog sa ika-25 ka tuig nga kasumaran sa pagmugna sa Republic Act 9003 o mas nailang Ecological Solid Waste Management Act of 2000, gilusad sa syudad pinaagi sa City Local Environment and Natural Resources Office (CLENRO) ang Zero Waste Month diin gisaulog kini matag bulan sa Enero.

 

Ang maong kalihukan nga gipahigayon adlaw’ng Lunes, Enero 12, sa Brgy Agusan gymnasium gisalmotan sa Environmental Management Bureau, City Community Affairs Office, Oro Chinese Chamber, Department of Education ug mga kabarangayan ning syudad.

 

Tumong niini nga mapahugtan ug mapalambo pa ang solid waste management program sa syudad ug mas mapalawom sa kabarangayan ang ilang kaakohan sa maong balaod.

 

Sa mensahe ni Edgar Naguio, chief Waste Control Division sa Clenro, iyang gipasabot nga dako og kaakohan ang matag barangay ingon man ang katawhan sa pagpakunhod sa gidaghanon sab asura sanglit usa kini sa hnungdan nga mas mapadali ang pagkapuno sa kasamtangang sanitary landfill.

 

Matud ni Naguio dili sayon ang pagdumala ug pagpangita og laing luna kung ugaling mapadali ang pagkapuno sa sanitary landfill. Gani man, dako ang pasalamat sa Clenro, sa pagpangulo ni Elvisa Mabelin, sa Brgy Pagalungan sa ilang pagdawat ug paghatag og luna nga mamahimong sanitary landfill sa syudad.

 

Ang Zero Waste Month karong tuiga nagdala sa temang “RA 9003 @ 25: Honoring Our Past, Renewing Commitments, Innovating for a Cleaner Tomorrow.” (ACM/CIO Photos by KIM ZALDIVAR)