Giaghat sa lokal nga kagamhanan sa Cagayan de Oro ang mga negosyante nga magpa-renew sa ilang business permit sa dili pa ang deadline nga gitakda karong umaabot Enero 20, 2026.

 

Sama sa naandan, abri ang Business One-Stop Shop kon BOSS sa City Tourism Hall ugmang adlaw’ng Sabado ug Dominggo, sugod alas-8:00 sa buntag hangtud ala-5:00 sa hapon aron mahatagan og igong panahon ang mga negosyante sa syudad nga maka-renew sa ilang business permit.

 

Gilugwayan usab sa City Finance Department ubos ni City Treasurer Jasmin Maagad ug Business Permits and Licensing Division ubos ni BPLD head Jason Adaza ang oras ting-trabaho hangtud ala-7:00 sa gabii, Lunes hangtud Biyernes, aron pagdawat sa mga aplikasyon sa business permit renewal and registration.

 

Dul-an 30,000 ka mga negosyante sa Cagayan de Oro ang gilaumang molukat sa ilang business permit karong tuiga human gisugdan ang annual renewal and registration niadtong Enero 5.