Gidala ni Mayor Rolando 'Klarex' Uy ang iyang unang sinemanang programa, ang Klarex nga Serbisyo sa Baryo (KSB), sa tuig 2026 didto sa Barangay Tagpangi, Adlaw’ng Sabado, Enero 17.

 

Malipayon ang mga residente tungod kay nakatagamtam sila pag-usab sa mga batakang serbisyo nga gidala sa maong barangay.

 

Lakip sa mga serbisyong gitanyag ang libre nga check-up sa mata, dalunggan, ug uban pang konsultasyon sa panglawas.

 

Dugang pa niini ang libreng tuli, hilot, ibot ngipon, pagpanghatag og libreng tambal, ug mga serbisyong may kalabotan sa edukasyon sama sa city scholarship ug libreng pag-eskwela sa kolehiyo sa City College, lakip na ang uban pang serbisyong dala sa KSB.

 

Mapasalamaton ang Kapitan sa Barangay Tagpangi nga si Hon. Chenet Marianas kang Mayor Klarex tungod sa walay puas nga suporta ug padayon nga pagdala sa mga batakang serbisyo ug tabang ngadto sa mga residente sa maong barangay.

 

Kabahin usab sa KSB ang 'Kasalan ng Bayan,' diin 17 ka mga magtiayon ang gikasal sa Barangay Tagpangi ug nakadawat sila og libreng lechon, cake, wine, ug bugas gikan sa pamilya Uy.

 

Mao kini ang ika-upat nga hugna sa KSB ni Mayor Klarex kansang tumong ang paghatag og dekalidad nga serbisyo aron mapaduol ang katawhan sa gobyerno, ug ang gobyerno mapaduol ngadto sa katawhan. (MDS/CIO/Photos by: Jhoanne Abejo, Roel Felicitas & Iren Fuentes)