USA na usab ka hugna sa People’s Day Program ni Mayor Rolando “Klarex” Uy ang gipahigayon karong adlawa, Enero 19, sa Barangay Baikingon Covered Court, diin 356 ka residente ang nakadawat ug nakabenepisyo sa libreng serbisyo sa city hall.

 

Gisugdan ang programa sa pagpakayab sa nasudnong bandila nga gipangulohan ni Mayor Klarex Uy kauban si Punong Barangay Ronello ‘Jao’ Gumapac ug mga miyembro sa Barangay Baikingon Council.

 

Mipadayag og dakong pasalamat si Punong Barangay Gumapac sa pagdala sa People’s Day sa ilang barangay, ingon man ang dakong pagdayeg kang Mayor Klarex sa talagsaon nga paghatod sa serbisyo sa katawhan.

 

Kauban ang mga department managers sa City Hall, gipaabot ang nagkalain-laing libreng serbisyo sa mga residente sa Baikingon sama sa medical check-up ug tambal, libreng lima ka kilong bugas gikan sa pamilyang Uy, wheelchair assistance, tabang sa pagproseso sa business permit, ug pag-atubang sa mga pangutana bahin sa scholarship, late birth registration, job application, ug uban pang serbisyo.

 

Usa sa nakabenepisyo si Analina Abragan, 63 anyos nga lumulupyo sa Zone 4-Baikingon diin personal nga miduol kang Mayor Klarex para mangayo og medical ug financial assistance sa iyang bana nga si Luis Abragan, 68 anyos, nga naghambin sa sakit sa kasing-kasing.

 

Sa laing bahin, gilusad usab ni Mayor Klarex ang city-wide Measles-Rubella Supplemental Immunization Activity (MRSIA) atol sa maong programa.

 

Giaghat niya ang mga ginikanan nga pabakunahan ang mga bata nga anaa sa 6 ka bulan hangtud 4 ka tuig ug 11 ka bulan batok tipdas ug rubella.

 

Gipahibalo usab ang tanan nga libre ang bakuna sa mga designated centers hangtud Pebrero 13.

 

Mitambong usab si Councilor Jing Daba, George Goking, Roger Abaday, ug Al Legaspi Sr. (DYM/Photos by Jhoanne Abejo/CIO)