SA tinguha nga makakab-ot og mas komprehensibong paagi aron matubag ang daghang hagit nga giatubang sa mga molupyo duol ug palibot sa mga creek nagpahigayon og survey ang Hapsay Sapa Team Lunes, Enero 19, 2026.

 

Mga komunidad palibot sa mga major creeks ang giadtoan sa Team diin ang Bitan-ag Creek ang ilang pilot area ilabina nga mao kini ang adunay pinaka daghang informal settlers nga nagpuyo ug dali ra usab mabahaan kung kusog ang ulan ingon man mga basura.

 

Naglaum ang Hapsay Sapa Team nga gipangulohan ni Patrick Gabutina nga pinaagi niini mas mahatagan og tukmang aksyon ang mga problema ug panginahanglanon sa mga komunidad palibot sa creek.

 

Ug sa samang higayon masulbad ang nagkadaiyang hagit nga giatubang sa syudad kalabot sa pag-atiman sa mga creek.

 

Ang pag-atiman sa mga creek maoy usa sa mga gihingusgan sa administrasyon ni Mayor Rolando `Klarex’ Uy ilabina nga usa kini sa mga hinungdan sa pagbaha kung kusog ang ulan nga makaapekto sa mga molupyo sa palibot.

 

Alayon niini, hugot niyang gisuportahan ang mga kalihokan sa Hapsay Sapa Team uban sa mga partner agencies ug private sectors. (ALR/CIO/Photos from Hapsay Sapa Team)