Gilugwayan karon ang deadline sa business permit renewal gikan Enero 20 ngadto na sa Marso 31, 2026.

 

Kini human paborableng giaprobahan ang rekomendasyon ni Mayor Rolando ‘Klarex’ Uy nunot sa hangyo nga ‘deadline extension’ sa hugpong sa mga negosyante sa Cagayan de Oro atol sa sesyon sa konseho ning syudad, Lunes, Enero 19.

 

Nasayran nga mipadangat og hiniusang sulat-hangyo ngadto kang Mayor Klarex si Mr. Almarco Brito, presidente sa Cagayan de Oro Chamber of Commerce and Industry Foundation, Inc. (Oro Chamber); Mr. Henry Dy, presidente sa Cagayan de Oro Filipino-Chinese Chamber of Commerce and Industry, Inc.; ug Mr. Efren Uy, presidente sa Misamis Oriental Filipino-Chinese Chamber of Commerce and Industry alang sa maong katuyoan.

 

Gipasabot sa tulo ka grupo nga dakong tabang ug alibyo ang paglugway sa deadline sa business permit renewal tungod kay nakasinati karon og mga hagit sa panudlanan ang mga negosyante resulta sa pagsaka sa real property tax sa Cagayan de Oro karong tuiga ug pag-usbaw sa minimum wage sa mga empleyado, lakip na ang paghinay sa kita sa miaging tuig.

 

Gilantaw nga dul-an 30,000 ka mga negosyante sa syudad ang gilaumang magpa-renew sa ilang business permit karong tuiga diha sa Business One-Stop Shop (BOSS) sa City Tourism Hall. (CIO)