PORMAL nang gibuksan sa lokal nga kagamhanan sa Cagayan de Oro City pinaagi sa City Health Office (CHO) nga gipangulohan ni Dr. Rachel Dilla, ang usa ka bulan nga Measles-Rubella Supplemental Immunization Activity (MRSIA), adlaw’ng Lunes, Enero 19, sa Barangay Macasandig.

 

Kapin 100 ka mga bata nga nag-edad unom (6) ka bulan hangtod upat (4) ka tuig ug onse (11) ka bulan ang nabakunahan atol sa maong kalihokan sa Brgy Macasandig.

 

Mapasalamaton ang mga ginikanan sa maong barangay tungod sa kahigayonan nga gihatag aron mapanalipdan ang kahimsog sa ilang mga anak batok sa measles ug rubella.

 

Misaksi usab si Councilor Paolo Nicolo Gaane, chairperson sa Council Committee on Health, ug malaumon nga mamahimong himsog ug lig-on ang mga kabataan sa syudad pinaagi sa padayon nga mga programa sa panglawas.

 

Ang immunization drive sa CHO gihimo sa pakigtambayayong sa Department of Health (DOH), United Nation International Children's Emergency Fund (UNICEF), ug World Health Organization (WHO).

 

Dumdoman nga sa nilabay nga mga tuig, house to house ang pamaagi sa pagbakuna, apan karon, gikinahanglan nga dal-on sa mga ginikanan ang ilang mga anak sa designated vaccination stations. (MDS/Photos by Iren Fuentes/CIO)