GIPAHIBALO ang publiko nga mobalik na usab ang pagpahigayon sa kagamhanang lokal sa Cagayan de Oro ubos sa administrasyon ni Mayor Rolando 'Klarex' Uy og ‘SurUy-SurUy sa Baryo’ (SSB) program matag adlaw'ng Martes ug Huwebes, karong Enero 27 diha sa Barangay Bonbon, ug Enero 29 sa F.S Catanico, diin nagkadaiyang serbisyo sa panlawas ang gitanyag sa katawhan.

 

Ang SSB gipangunahan sa City Health Insurance Department (CHID) uban sa hugot nga suporta sa City Health Office, JR Borja General Hospital ug uban pang buhatan sa city hall sa tuyo nga makahatag og libreng medical consultation, dental ug eye-care services, panghatag sa tambal, Philhealth services ug uban pa.

 

Kini agi'g katumanan sa tinguha ni Mayor Klarex nga mapaduol ang gobyerno sa katawhan ug ang katawhan duol sa gobyerno pinaagi sa paghatod sa mga serbisyo diha mismo sa mga komunidad. (AGP/File photos Jhoane Abejo/CIO)